فيه ناس كل وقتهم فى الشغل بس
ممكن يشتغل 18 ساعةعشان عايز يجيب فلوس اكتر .. عشان يحقق اللى نفسه فيه وكمان عشان اسرته
عشان بيقول ان اولادى لازم يعيشوا حياة حلوة بعد كده
هو يشتغل ويقضى وقته كله فى الشغل ولما يرجع البيت عايز ينام عشان يصحى تانى يوم يروح شغله وهكذا
اولاده مش بيشوفوه .. مراته مش بتشوفه غير لما يجى ينام او ياكل بس
الايام بتمر .. وهو بيشتغل اكتر
جاب فلوس كتيرة .. قالك انا عايز فلوس اكتر
وكل مرة يقولك لازم اجيب فلوس اكتر واكتر
لحد ما اولاده كبروا وخلصوا جامعات واتزوجوا
وهو تعب جسديا وكان بيتحرك بصعوبة
يعنى كل وقته كان فى البيت
لكن العلاقة بينه وبين مراته مكنتش حلوة
مكنش فيه كلام بينهم غير لما ياكلوا او يتفرجوا على التليفزيون .. غير كده كل واحد مع نفسه .. وكمان هو كان بيزعق كتير لمراته لانه مش مستحمل قعدة البيت و مراته كانت بتقعد فى اى اوضة لوحدها عشان بتخاف انه يمد يده او يهينها
لكن اولاده كانوا مشغولين فى حياتهم ومحدش فاضى يقعد معاه
ممكن يشوف اولاده مرة كل عيد .. وتكون الزيارة سريعة
وهنا اتضايق جدا لان محدش فيهم بيسأل عليه
واحد من اولاده قاله انت السبب .. انت عودتنا على كده .. انت كنت بتهتم بشغلك .. كان كل هدفك انك تجيب فلوس بس .. لكن مكنتش بتسأل علينا ولا تعرف احنا كويسين ولا وحشين .. عاملين ايه فى حياتنا .. كل ده مكنتش تعرفه .. كن بنشوفك بس لما تيجى تنام
انا عن نفسى جتلك مرات كتيرة واقولك يا بابا عايز اتكلم معاك فى حاجة ... وانت كان ردك انا مش فاضى .. انا مشغول .. عمرك ما قعدت معايا
جاى دلوقتى وتقول انتوا ليه يا اولادى مش بتسالوا علي ولا بتقعدوا معايا .. انت اللى عملت كده .. مش احنا
دايما باخد نصيحتك فى اى مشكلة بقابلها او موضوع محتاجة اخد قرار فيه لانك بتفكر صح .. عقلانى جدا
ردحذف