شخصية ( ب ) قعد مع الزوج والزوجة وقالهم هنقعد مع بعض وكل حد فيكم هيقول كل حاجة مضايقاه من التانى بس بدون اهانة .. بدون تجريح .. الزوج والزوجة رفضوا وقالوا الموضوع انتهى .. وبعد محاولات كتيرة من شخصية ( ب) .. وافقوا
شخصية ( ب ) قال للزوجة هتقولى كل حاجة مضايقاكى منه وقال للزوج .. سيبها تطلع كل اللى جواها وبعد ما تخلص .. انت كمان هتحكى
فعلا الزوجة قعدت تحكى وقالت لما بيرجع البيت لازم يكشر فى وشى .. وهو قاعد فى البيت ممنوع اى اصوات .. ممنوع اى دوشة .. ولما اجى اكلمه فى موضوع الاقيه بيتعصب علي ويقولى مش عايز اسمع حاجة .. لما اقوله حاجة تخص الاولاد يقولى هو ليه انتى بتتكلمى كتير .. لما اكلمه فى مشكلة يقولى حليها انتى .. مش فاضى .. اتصرفى انتى .. دايما بيضربنى ... اول سنة زواج كان بيعاملنى حلو .. لكن بعد كده لقيته بيعاملنى وحش .. مفيش اهتمام منه .. دايما بيقلل منى ويقولى زمان كنتى جميلة .. لكن دلوقتى بقيتى وحشة .. فيه ستات احلى منك
.. احنا مش بنتكلم مع بعض .. انا باباى ومامتى ماتوا من فترة .. معنديش اخوات .. يعنى انا ماليش حد غير زوجى واولادى .. عايزة افضفض واطلع اللى جوايا .. اقول لمين .. وهو مش عايز يسمعنى .. نفسى يقولى مالك متضايقة من ايه .. انا جنبك .. اوعى تخافى .. نفسى يطبطب علي .. انا تعبت .. مش قادرة
الزوج قعد يحكى ويقول لما برجع البيت بلاقيها مشغولة فى النضافة وحاجات البيت ولسه هقعد على الكرسى الاقيها جاتلى وتقولى الحق اولادك عملوا مشاكل .. اتصرف انت معاهم .. الحق فيه مشاكل تانية حصلت .. قلت ليها سبينى ارتاح شوية واكل وبعديها قولى كل مشاكلك .. تقولى حاضر .. تانى يوم الاقيها عملت نفس اللى بتعمله .. لقيتها مش عايزة تتغير .. دايما الاقى البيت نكد .. زعيق مع الاولاد واصوات عالية .. دايما بتفرض رايها علي ولازم انفذ كلامها ولو رفضت .. الاقيها زعلت والبيت بقى نكد .. هى بتقلل منى قدام اولادى .. دايما تقولى جملة مستفزة ( انت مش راجل ) .. وانا ارد عليها واقولها انتى مش ست .. فيه ستات احلى منك ..
ابتديت ارجع البيت الساعة 11 بليل وانام واصحى تانى يوم 7 الصبح... حتى يوم اجازتى مش بقعد فى البيت عشان مش عايز نكد .. انا تعبت .. دى مش حياة
شخصية ( ب ) بعد ما سمع كل الكلام واتاكد ان الاتنين قالوا اللى حصل فعلا .. قال لكل شخصية فيهم .. ايه الغلط اللى عمله .. ليه الطرف الاخر غلط .. هو بيحبك .. مكنش قاصد لانه كان مخنوق .. مجروح .. كان متالم
قالهم ممكن نأجل قرار الانفصال 4 شهور ونجرب حاجات ممكن تصلح علاقتكم ببعض .. ولو لقينا مفيش تغيير وانتوا عايزين تنفصلوا .. اعملوا اللى انتوا عايزينه
وبعد محاولات من شخصية ( ب ) .. وافقوا انهم يجربوا
شخصية ( ب ) قالهم .. كل حد فيكم مطلوب منه حاجات يعملها ولو طرف فيكم معملش حاجة من الحاجات دى .. هيجيب شيكولاته لى انا
- انتوا الاتنين ومعاكم اولادكم هتاكلوا وجبة العشا مع بعض .. وانتوا بتاكلوا .. اسالوا اولادكم عملتوا ايه فى المدرسة النهاردة .. خليهم يتكلموا وبعد ما يخلصوا .. حضرتك هتسال زوجتك عملت ايه النهاردة .. خليها تحكى .. وبعد ما تحكى .. هتساليه انتى كمان وتقوليله عملت ايه النهاردة .. خليه يحكى .. بلاش تحكوا اى مشاكل .. بلاش طاقة سلبية .. اضحكوا
- بعد ما تشربوا الشاى .. ممكن حضرتك تقولى لزوجك اى مشكلة محتاجة حل .. وانتى بتحكى قوليله انا شايفة اننا نعمل واحد واتنين وتلاتة .. انت شايف ايه .. هيقولك انا شايف نعمل واحد واتنين .. اتكلموا بهدوء .. لقيته انه هياخد قرار غلط .. قوليله القرار ده هيعمل اضرار بعد كده .. ولو قالك لا .. قوليله فكر .. وبعد شوية قولى قرارك .. وانا واثقة فيك لانك انت سندى ..
انت بلاش تبقى عنيد مع زوجتك .. دى سندك .. هى بتخاف عليك .. عشان كده لما تاخد قرار فكر بهدوء
- لما زوجك يرجع البيت بلاش تحكى اى مشاكل .. خليه يرتاح
- بلاش تكشر فى وش زوجتك لما ترجع البيت .. لان هى قاعدة لوحدها طول الوقت فى البيت .. مش بتتكلم مع حد .. انت بالنسبة ليها الحاجة الحلوة .. خفف عنها .. كل ما تسمع ليها وتقولها كلام حلو .. كل ما البيت هيبقى مليان سعادة .. مش هيبقى فيه نكد .. هتلاقيها بتعملك مفاجات حلوة فى البيت .. هتحس ان البيت بقى جنة .. هتلاقيها بتخاف عليك اكتر .. بتديك حنان اكتر
- لما تحسوا انكم هتتخانقوا .. قولوا لبعض .. بلاش خناق ونأجل المناقشة ليوم تانى وتعالى نعمل حاجة حلوة
وفيه حاجات تانية قالهم عليها
فعلا عملوا الحاجات دى .. اول اربع ايام كان حلو .. يوم اختلفوا .. 5 ايام كان حلو .. يومين اختلفوا .. اسبوعين كان حلو .. 3 ايام اختلفوا .. شهر كان حلو .. لحد ما فهموا بعض اكتر .. وحسوا انهم مش هيقدروا يستغنوا عن بعض وقالوا اننا مش هنسيب بعض
ملاحظة : شخصية ( ب ) هو بطرس بيتر
ليست هناك تعليقات:
إرسال تعليق