واحدة اتزوجت شخص بتحبه بجنون .. وبعد فترة .. الشخص ده ظهر على حقيقته وبقى استغلالى وخبيث .. بياخد منها فلوس وبيتعامل معاها بعنف .. ويجى قدام الناس يظهر انه هادى ورقيق ومش غلطان .. وهى العكس .. تظهر قدام الناس انها عصبية .. شخصية لا تطاق .. مع انها طيبة .. رقيقة .. بس مش عارفة تعبر وتقول اللى جواها صح
العائلة والمقربين شايفين ان هى غلطانة علطول وزوجها ملاك مش بيغلط .. بطلت تشكى .. بطلت تتكلم .. قعدت تبكى مع نفسها بدون ما حد يشوفها .. لحد ما ملامحها اتطفت وحست انها بقيت عجوزة وهى شابة جميلة وقعدت تاخد ادوية وتنام وقت طويل وبعد وقت زوجها انفصل عنها وهى عاشت فى بيت اهلها
وفى يوم من الايام قعدت تكسر حاجات فى الشقة وباباها يقولها انتى مجنونة .. عشان كده جوزك سابك .. وبعد ايام لقوها مش بتتكلم .. لقوا دموعها بتنزل وهى صامتة .. قعدت على الحال ده فترة .. وتم عرضها على دكاترة ومفيش تقدم ..
واحد مقرب من العائلة قالهم ان شخص ( ب ) ممكن يساعدكم
شخصية ( ب) قعد مع الاب والام وسألهم عشان يعرف كل حاجة عنها .. و بعد ما عرف .. قعد معاها المرة الاولى وقالها انا عارف انك تعبتى واستحملتى كتير .. عارف ان مفيش حد كان مصدقك وانت كان ليك حق .. عارف ان زوجك اذاك نفسيا .. عارف ان باباك ومامتك محدش فيهم وقف معاكى .. عارف انك كنتى لوحدكى وكنتى محتاجة حد ينقذك .. ابتد يقولها كل حاجة هى حاسها عشان يخليها تتكلم وهى ساكتة .. تانى يوم قعد معاها وابتد يقولها حاجات تانية هى حاسها وهى ساكتة .. تالت يوم عمل نفس الامر .. وبعد مرور ساعة قعدت تبكى وتصرخ بصوت عالى وقالت لشخصية ( ب ) انت الوحيد اللى حسيت بى وصدقتنى .. انت قلت حاجات كتيرة كان نفسى اقولها .. بس كتمتها جوايا عشان مفيش حد مصدقنى .. ابويا وامى المقربين منى .. محدش فيهم صدقنى .. كلهم قالولى انتى مجنونة .. قعدت تتكلم وتحكى وتقول كل اللى حصل معاها .. وشخصية ( ب ) بيسمع ليها .. بعد ما اتكلمت .. حست براحة .. رابع يوم قعدت تحكى اكتر ..
الاب والام اتكلموا معاها وقالوا ليها .. احنا غلطانين .. كان المفروض نصدقك .. كان المفروض نقف معاكى وقعدوا يبكوا وخدوا بنتهم فى حضنهم ..
الاب لما بيرجع البيت يسال على بنته ويخدها فى حضنه والام بتاخد بنتها فى حضنها
وبعد مرور ايام سالها شخصية ( ب ) قالها ايه الحاجات اللى نفسك تعمليها .. قالته حاجات كتيرة .. قالها تعالى ننفذها .. فعلا نفذتى معظمها .. ابتدت تشوف الحياة افضل .. ابتدت تهتم بنفسها اكتر .. ابتدت تضحك اكتر .. ابتدت ملامحها تنور اكتر .. قالت لازم اشتغل .. فعلا اشتغلت .. كانت سعيدة اوى .. وبعد فترة قررت انها تفتح شركة ونجحت اكتر والشركة قعدت تكبر اكتر وبعد فترة اتعرفت على شخص جميل وتم الزواج
ملاحظة : شخصية ( ب ) هو بطرس بيتر
ليست هناك تعليقات:
إرسال تعليق