الاب والام دايما بيتخانقوا طول الوقت .. صوتهم عالى جدا
الفتاة كانت بتقعد طول الوقت فى اوضتها
لما كانت بتيجى تتكلم مع مامتها فى حاجات خاصة بيها .. كانت الام تزعق ليها وتقولها انا مش فاضية ليكى
طبعا الفتاة كانت بتخاف تتكلم معاها لان الام دايما بتتعصب عليها
لحد ما فى يوم اتعرفت على بنت .. البنت دى كانت واثقة فى نفسها اوى وكانت خبيثة جدا .. المهم بقوا اصحاب وبيخرجوا مع بعض كتير .. طبعا الفتاة كانت بتقولها كل اسرارها ... الصاحبة دى استغلت الامر ده وعرفتها على اولاد مش كويسين .. وبعد وقت الفتاة عملت حاجات مش كويسة .. طبعا الام فى البيت متعرفش حاجة عن بنتها ومين صاحباتها ومين اصحابها .. كل اللى بتعمله انها بتتعصب كل مرة لما بتتكلم معاها .. لحد فى يوم من الايام عرفت ان بنتها بتعمل حاجات مش كويسة بره .. طبعا قالت لبنتها ممنوع الخروج من البيت .. البنت قالتها لا .. انا هخرج .. الام طبعا حبستها ف البيت .. وبعد ايام البنت هربت ومرجعتش تانى ..
الاب والام قعدوا يبكوا كتير .. وليه عملت كده .. وفهموا ان هم السبب .. بس بعد ايه .. بعد فوات الاوان
عزيزتى الام
بنتك اتصاحبى عليها ... اسمعى منها بدون عصبية .. اتناقشى معاها .. دايما قولى ليها انا بحبك وهفضل احبك .. خلى بنتك تقولك كل اسرارها بدون خوف .. احضنيها كتير .. الحضن ده حلو اوى
عزيزى الاب
كل ما هتتخانق مع مراتك .. كل ما البيت هيبقى فيه نكد ... كل ما بنتك هتكره قعدة البيت .. هتخاف تتكلم معاك لانك عصبى ..
لكن لو علاقتك بمراتك حلوة .. بتقولها كلام حلو .. مفيش اهانة .. البيت هيبقى مليان حب وسعادة ..
انتوا الاتنين نفسيتكم هتبقى مرتاحة ومبسوطين وبالتالى معاملتكم مع بنتكم هتختلف .. هتلاقوا نفسكم بتدوها حب وحنان وبتسمعوا ليها لانكم شبعانين حب
ليست هناك تعليقات:
إرسال تعليق