موضوعات
recent

إزاي تبدأ في بيع منتجاتك أون لاين ؟

 انت كرائد أعمال بتفكر في بيزنس البيع أونلاين بس مش عارف تبدأ إزاي ، إحنا هنحاول نساعدك بمجموعة خطوات ممكن تضمن لمشروعك إنه يكون ناجح :

1.شوف إيه اللي ناقص وحاول تكمله : معظم الناس اللي بتحاول تبدأ البيزنس بتاعهم بيوقعوا نفسهم في خطأ كبير، إنهم بيدوروا على المنتج اللي يبدأوا بيه وبعدين بيحددوا السوق المستهدف ، والصح عشان تعزز فرصك في النجاح فإنت محتاج تحدد السوق بتاعك الأول من خلال أنك تدور على حاجة الناس عايزاها ومش لاقيين لها حلول كتير، والإنترنت هيساعدك أنك تلاقيهم إما :

• من خلال بحثك في المنتديات عن الأسئلة اللي الناس بتسألها والمشاكل اللي مش لاقيين لها حلول .

• أو إنك تزور مواقع منافسينك المحتملين وتعرف إزاي هما بيعرفوا يسدوا الطلب على أي منتج عندهم وبكده هتعرف تحدد المنتج اللي هتبدأ بيه في سوق موجود بالفعل وكمان هتحاول تخليه أفضل من منافسيك .

2.المنتج القوي : إنك تبدأ في مجال البيع اونلاين بشكل ناجح ده ممكن يكون سهل جدا لو لقيت منتج قوي ، ومن الأفضل إنهم يكونوا مجموعة منتجات قوية .

إنت مش محتاج أنك تخترع منتج جديد عشان تبدأ بيزنس ناجح فمتروحش لمنتجات هيكون من الصعب عليك إنك تلاقيها أو إن تكلفة تصنيعها متخليش في أي هامش ربح ليك .. انت بس كل اللي عليك أنك تدور على تجار الجملة هتلاقي مجموعة كبيرة من المنتجات بأسعار معقولة جدا ، هتقدر تحدد منها المنتج اللي هيناسبك ، والقابل للتسويق، ويوفرلك هامش ربح كويس .

3.اعرف اللي ليك واللي عليك : عشان تبدأ تبيع أون لاين بنجاح لازم تكون حاطط في بالك وعارف كويس جدا مجموعة اعتبارات مهمة منها :

• إنت هتحتفظ بالبضاعة بتاعتك فين ؟ وده هيعتمد على حجم المخزون اللي هتخليه عندك ، فلو حجم البضاعة بتاعتك قليلة ممكن تحتفظ بيها فى بيتك ولو أكتر هتضطر تأجر مخزن مثلا تحطها فيه .

• طرق الشحن اللي هتستخدمها ، لو هتتعامل مع شركة شحن فلازم تعرف إن فيه منتجات بيبقى في قيود في عملية شحنها زي الفواكه الفريش أو الخضار، العطور ، المواد سريعة التلف، السجائر والخ، ففي شركات ممكن ترفض عملية شحنها بالأساس وفي شركات ممكن تضطر تدفع مبالغ إضافية، وعشان كده لازم تقرأ بدقة التعليمات الخاصة بكل شركة هتتعامل معاها .

• طرق الدفع ، فلو كنت هتقبل بطرق الدفع أونلاين لازم تعرف إيه الرسوم اللي ممكن تتفرض عليك والميزات اللي بتوفرها وتقدر تكشف بيها عمليات الاحتيال اللي ممكن تتعرضلها ، ولو هيكون الدفع نقدي وقت استلام المنتج مع الشحن فهل تكاليف الشحن هتتحملها انت ولا العميل بتاعك .

• لازم تراعي حقوق الملكية الفكرية والعلامات التجارية وبراءات الاختراع في منتجات معينة واللي ممكن تتطلب منك شروط للحصول عليها ، متخاطرش بالمجهود اللي بذلته وتضيعه عن طريق الخطأ .

4.تصميم وبناء موقعك الالكتروني : دلوقتي أنت جاهز لتصميم موقع الويب الخاص بشركتك ، وبما ان الموقع هو الواجهة لك فلازم تخليه بسيط وجذاب ، فأنت قدامك أقل من خمس ثوان لجذب انتباه عملائك ، بس خد بالك إن الطريقة دي ممكن تكون مكلفة لأنها باستمرار هتحتاج للتطوير .

وفي حالة لو أنت هتبيع منتجاتك على أحد المنصات التجارية زي امازون  و جوميا  مثلا فده بيكون الحل الامثل لأنك مش هتشغل بالك بأي أمور فنية زى تطوير و استضافة و تصميم موقعك , ده غير المنصات دي بتصمم خصيصا للمستخدم العادي وعشان كده التعامل معها بيكون سهل جدا .

5.التسويق : عشان توجه الاشخاص وتجذبهم لموقعك الجديد .. الخطوة دي هتعتمد على الاستراتيجية التسويقية اللي انت هتستخدمها واللي ممكن تكون واحدة من الحاجات الجاية :

• جودة منتجك أولا وأخيرا هو العامل الأساسي في البزنس بتاعك عشان كده لازم تختاره بعناية ، فالجودة بتخلق الثقة والسمعة .

• العروض والتخفيضات على المنتجات اللي بتقدمها من الوسائل المهمة في جذب الزبائن لموقعك .

• التسويق بالإيميل عن طريق ارسال ايميلات بشكل منتظم بها أحدث المنتجات والخدمات والعروض اللي بتقدمها على موقعك .

• تهيئة موقعك لمحركات البحث ، فأكتر من 88% من مستخدمي الإنترنت يبحثون عن المواقع والمنتجات والخدمات عن طريق محركات البحث وأهمها Google .

• التسويق على مواقع التواصل الاجتماعي مهم جدا لأنها من أقوى الوسائل للوصول لشريحة كبيرة جدا من الزبائن ، ده غير إنها بتوفر سبل للتواصل السريع بينك وبين زبائنك .

• التسويق بالعمولة يعني أنك تتيح لزوار متجرك التسجيل على نظام الأفلييت عشان يروجوا لمنتجاتك من خلال رابط خاص في مقابل ارسال عمولات على البيع .

• استخدام أدوات تتبع الزيارات على موقعك عشان تتعرف على نقاط القوة والضعف في موقعك وتقوم بتحسينه بشكل دائم ، ومن أشهر وأهم الأدوات هي  Google Analytics.

بيع المنتجات عن طريق الانترنت هي الطريقة الأرخص والأسهل عشان تبدأ عملك الخاص أو لزيادة مبيعاتك لو كنت بالفعل بدأته ، فتكلفة فتح موقع بيع إلكتروني والتسويق له هتكون أقل مقارنة بفتح محل عادي . 

أهم شيء لازم تاخد بالك منه هو مراقبة ردود الأفعال والتغيير والتطوير ، ومن خلال تحليل اللي بيناسبك واللي مش هيناسبك ، هتقدر تنشط تجارتك وتميز نفسك عن منافسينك وتوصل للنجاح .

 

 


بطرس

بطرس

ليست هناك تعليقات:

إرسال تعليق

يتم التشغيل بواسطة Blogger.